صُحبتك .. شخصيتك

لسة جاية من فرح واحدة صاحبتي . .. عقبالكم جميعا ..

بس للأسف جاية زعلانة .. وكنت هعيط من الغيظ ..

لييييه ؟؟؟

لانها ( العروسة الملتزمة ) كانت مشغلة اغاني خادشة للحياء ..

مش هقول حرام ... عشان الناس اللي بتحب الجدل تاخدها من قاصرها و ما تجادلش ..

فعلا كلام الاغنية قبيح و كلمة " خادش" دي قليلة والله ... ده هو جارح للحياء ... بل " قاتل " للحياء ..

المهم ..

قمت مطلعة فلاشة معايا عليها اغاني اسلامية ... هي اغاني برضو ينفع نسقف معاها و ظريفة وفيها موسيقي كمان ..

( لان انا باخد بالراي ان الموسيقي ليست حرام طالما الكلمات توافق الشرع و المغني رجل أو أطفال وليس امرأة )

شغلناها شوية .. والبنت اللي قاعدة عالكومبيوتر قامت مشغلة تاني .. الاغاني اياها .. قمت روحت قولتلها تشغل

الاغاني اللي انا جايباها .. قالتلي بس هم امبسطوا من دي و بيسقفوا عليها كمان و بيرقصوا !!! اقفلها يعني ؟؟!!

قمت روحت للعروسة ذات الشخصية القوية جدا بل والكاسحة ( من موقف كانت بتفاصل فيه مع سواق تاكس كان الراجل عامل زي الكتكوت قدامها من كتر ما شخصيتها قوية )

وقولتلها تقول للبنت انها مش عاوزة الاغاني دي .. قامت قالتلي ... !!

قوليلها انت !!

قلتلها انت العروسة .. انت اللي بإيدك الموضوع كله .. ما اتكلمتش !!

.. قمت كلمت البنت تاني و قلتلها ان العروسة بتقوللك بلاش الاغاني دي .. راحت موقفة مؤقتا .. وبعدين شغلتها تاني ..

انا كان ممكن اتنيني لاخر اليوم بعمل الموقف ده لولا حاجة حصلت .. ايه هي ؟؟

اني لا قيت العروسة متفاعلة مع الاغنية و بتسقف ولا كإن في حاجة .. لما قلتلها : المفروض ما تشغليش الاغاني دي عشان تبتدي حياتك صح وربنا يباركلك فيها ..

صحابها قالولي : ايه المشكلة احنا بنات في بعض .. راحت هي قالتلي : ايوة .. ايه المشكلة ؟؟

صحيح .. ايه المشكلة ؟؟

انك تبتدي حياتك بمعصية .. ايه المشكلة ؟!

انك تسن سنة سيئة ... ايه المشكلة ؟!

انك تجاهر بالمعصية وتسمع الجيران كمان .. ايه المشكلة ؟؟!

ان اخواننا بيموتوا في غزة .. و تبقي مش عارف تقول للباطل لأ .. ايه المشكلة ؟؟

ساعتها .. من سكات قلتلها سلام عليكم .. و روحت ..

لان وجودي فيه اثبات للوضع .. وكأن مافيش حاجة غلط .. وكمان لازم اتفاعل ودي المصيبة الاكبر .. يعني اقرار مني بالموافقة ..

-----------------

أنا مش هتكلم علي الاغاني القاتلة للحياء او خلافه .. والا كان البوست عنوانه بيدل علي كدة ..

لكن العنوان .. صُحبتك .. شخصيتك

انا لما كنت بسمع قصة عقبة بن ابي معيط .. وانه كان خلاص هيسلم على ايد الرسول صلي الله عليه وسلم لولا صديقه ابو جهل كنت ببقي مش مصدقة .. لكن دلوقتي عرفت يعني ايه اصدقاء .. و اد ايه بيأثروا علي الواحد مهما كانت شخصيته قوية زي صاحبتي دي .. او زي عقبة بن ابي معيط .. مع الفارق طبعا في المواقف ..

وانا راجعة من بيتهم مشي رغم انه بعيد ..

راجعت شخصيات صحابي قدام عنيا .. و تخيلت نفس الموقف وانا مكانها وقولت الحمد لله اللي رزقني بصحبة صالحة تثبتني علي الحق .. مش تجرني للنار

ياريت تراجع صحابك و انت هتعرف .. يا ترى شخصيتك قوية .. ولا ضعيفة ..

قوية بالحق لو اصدقاء صالحين ... ضعيفة بالباطل لو اصدقاء سوء ..

ولا انت ايه رايك ؟؟