بسم الله الرحمن الرحيم
مرحبا .. أصدقائي المدونين ... أصدقاء النت
الفاصل طول اوي .. معلش انا عارفة
بس ده لأني كنت مشغولة جدا الفترة اللي فاتت في معرض الكتاب .. لأني كنت بروحه بشكل شبه يومي .. لأني منضمة لجمعية بتعمل نهضة صحية عن طريق التوعية .. فكان كل يوم تقريبا مشغولة بيهم .. بجد عذرا عن انقطاعي الفترة السابقة .
كنت ناوية أتكلم عن فلسطين .. بس هأجلها لحد ما جيب الداتا..
خلونا النهاردة نتكلم .. عن حاجة مهمة أوي في النهضة .. ومش بتكلم علي نهضة أمتنا بس .. لكن هي مهمة في أي نهضة لأي أمة في الدنيا .. و الحاجة دي هي أول خطوة في سلم النهوض .. من غيرها الرؤية تكون مشوشة .. وجايز كمان النهضة ماتحصلش بسبب عدم وجود الشئ ده .. ده علي مستوي الأمم .. طب علي مستوي الأفراد ؟
قيمة الفرد تتحدد بمقدار الشئ ده لو هو كبير يبقي الفرد ده هيكون شخصية عظيمة .. لو هو صغير هيكون انسان عادي .. طب لو مفيش خالص ؟ يبقي ما فيش فرق بينه وبين - عذرا في الكلمة - الحيوانات
يا تري عرفتم هو ايه ؟؟
مظبوط ..
الشئ اللي انا بتكلم عنه ..
هو ..
الحلم ..
لازم يكون ليك حلم نفسك تحققه .. و كل ماكان حلمك كبير كل ما هتكون شخصية عظيمة في المستقبل .. و لو مافيش حلم ليك ..
تأكد .. انك هتكون جزء من حلم شخص آخر
لوكان عندك حلم كبير يبقي ممتاز ربنا يباركلك و تحققه .. و تنفع بيه الأمة .. أما لو ماكانش ليك حلم .. يبقي من فضلك ابدأ احلم من النهاردة و راعي الحاجات دي وانت بتحلم
1 - لا تضع قيود أمام حلمك ( يعني نفسك تنشئ مصنع سيارات مثلا و يكون الأول في الوطن العربي .. قول لنفسك ليه ما يبقاش علي مستوى العالم ؟؟ )
2 - انسى العقبات و انت تتخيل حلمك .. ( يعني ما تقعدش تقول طب والبطالة ؟ وقلة الفلوس ؟ و .. و .. )
3 - اجعل حلمك يفيد الوطن ( يعني ما تحلمش مثلا انك تبقي رائد فضاء .. لان احنا في وطننا العربي ما عندناش أصلا ارتياد الفضاء .. يبقي لو بقيت رائد فضاء هتروح امريكا مثلا فتنفعهم بعلمك وتزيد الفجوة العلمية بيننا وبينهم .. لكن الصح بقي انك تحلم بإيه ... انك تنشئ وكالة زي ناسا مثلا في وطننا العربي يبقي انت ما بعدتش كتير عن حلمك و في نفس الوقت افدت الوطن و حققت جزء من النهضة )
4 - كل يوم خصص وقت معين تحلم فيه بحلمك وبأدق التفاصيل ( يعني لو نفسك تكون لاعب كرة مشهور و محترم زي ابو تريكة مثلا .. تخيل نفسك في الملعب و اصوات الجمهور بتشجع وانك دخلت جون بجد .. يعني كأنك عايش في الحلم بالظبط )
5 - لا تتحدث عن حلمك أمام المحبطين و المثبطين للعزائم ( عشان ما يهبطوش من عزيمتك )
6 - ابدأ حول حلمك إلي هدف مكتوب في ورقة وابدأ في تجزئ الهدف إلي أهداف مرحلية ثم ابحث عن طرق تحقيق كل هدف ( يعني لو نفسك تكون دكتور في كلية ما .. يبقي تكتب الهدف وهو ان أكون دكتور في كلية الهندسة مثلا ثم تجزي الهدف إلي أهداف مرحلية : المرحلة الأولي ---> الثانوية العامة يبقي لازم تجيب مجموع يدخلك هندسة .. المرحلة الثانية ---> لما ادخل الكلية .. لازم اكون من الاوائل .. ده التجزئ
طب والتنفيذ : اني في ثانوية هاحتاج دروس في المواد الفلانية و في الكلية هشتري الملازم من مكتبة كذا .. وهكذا .. )
7 - المتابعة : هل انا حققت المطلوب في الوقت المطلوب ولا لأ ؟ ( ودي من أهم المراحل يعني النجاح 70% منه متابعة )
8 - استعن بالله في كل خطوة من الخطوات السابقة فــ ربنا هيوفقك ويسددلك خطاك ويباركلك في وقتك و هيبعتلك ناس تساعدك في تحقيق حلمك ( وده بالتجربة مش كلام انشاء )
طب افرضي بقي اني كان ليا حلم كبير و اتظلمت - أو حتي ما اتظلمتش- في تنسيق الثانوية العامة و دخلت كلية مالهاش علاقة بحلمي خالص و انا فيها دلوقتي أو اتخرجت وبشتغل .. أعمل إيه بقي ؟؟
ده اللي هتعرفه في البوست القادم إن شاء الله
أسيبك بقي مع الزجل ده .. بعنوان :
الحلم الكبير
-------
لا تتحدث كثيرا ً
عن حلمك الكبير
فقد يكون سبباً في موتك
وأنت صغير
و لكن
ما المشكلة .. إن مت
وبموتك يهتدي الكثير و الكثير
كغلام الأخدود مثلا
بإذن العلي القدير
فعمرك في الدنيا أصلا قصير
و من كان له حلم كبير
يبارك القدير
في عمره القصير
و لكن
أعيدها ثانية
لا تتحدث عن حلمك الكبير
طالما انت به موقن
و لا تحتاج إلي تقدير
كي تمضي في طريق التغيير
فلا تفتح باب
يأتي بريح مستطير
و تريد أن توقد شمعة التغيير
فأني لها أن تنير ؟!!
فعليك
كما أوصانا الهادي البشير
بالكتمان
لقضاء حوائجنا
و نفع الغير
فبذاك
يُفاجأ العدو
و يُسقط في يده
فلا يحسن التدبير
و عندئذ يكون في موقف
هو جد خطير
و لكن ماذا يفعل
لو أننا جميعا
من ذوي الحلم الكبير
حينها
يوشك التغيير أن يصير
ولأصبح العدو كالطفل الغرير
أمام عزيمتك
و حلمك الكبير
وإن مت
مت مرفوع الرأس
محققا لحلمك
مرتاح الضمير
ولا تقلق
فقبل موتك بأيام أو سنوات
و فقاً لاستباقك في الخيرات
سيلهمك الله فعل الخير
لتصل لأعلي الدرجات
فهل لك من توبة نصوح
قبل الممات
و حُلم تعيش له
بدلا من أن تكون
- عذراً -
كالحيوانات !!
( تنويه : لا تتشائم من الزجل ده مش كل اللي بيتكلم عن حلمه الكبير بيموت بس ده أحيانا بيحصل مع العلماء فقط )
