لازم نتغير ..

قبل رمضان سمعت شريط و قرأت مقالات عن استقبال رمضان و حضرت درس كمان .. و نزلت بوست علي الموضوع ده .. و اللي استفدته من الكلام ده كله ان شهر رمضان ربنا فرضه علينا عشان نتغير ( لعلكم تتقون ) ..
.. و فعلا - الحمد لله – خرجت من رمضان وعيوب فيا كتير – بفضل الله – متصلحة نسبيا ..
وانا حبيت اشارككم معايا في وصفة التغيير اللي جربتها والحمد لله نفعت وجابت نتيجة حلوة معايا ..

و هي علي 3 محاور :
المحور الاول :
مع الله :

1 – الدعاااااااااااااء المستغيث

كل يوم و لو 3 دقائق و يا سلام لو وانت بتفطر بعد صيام يبقي احلي حاجة لان للصائم عند فطره دعوة لا ترد .

2 – كثرة السجود ..

ولو ركعتين خفاف تواظب عليهم ( لأن الرسول قال لصحابي في موقف من المواقف : أعني علي نفسك بكثرة السجود )

3 – قراءة القرآن

ولو صفحة واحد بس تداوم عليها .. هتقولي طب وايه علاقة القرآن بتغيير العيوب ؟؟
هقولك الاية ( و ننزل من القرآن ما هو شفاء ورحمة )
---------------------------------
المحور الثاني :
مع النفس :

1 – رغبة التغيير :

و دي د . طارق السويدان بيقول عليها انها اهم حاجة لتغيير الانسان .. من غيرها انسي انك تتغير .. س / طب تعرف ازاي ان بوادرها عندك ؟؟
ج / انك تبقي حاسس بالتقصير و انك عاوز تكون افضل
و اللي هيشعل الرغبة دي عندك انك تنظر لمن هم اعلي منك في الاخلاق والدين .

2 – الفعل العكسي :

بمعنى انك تعمل عكس الفعل المراد تغييره
مثال : شخص يعاني من الكذب .. يبقي يحاول يتحري الصدق .. و اللي هيعينه علي كدة كثرة الدعاء ..

3 – اكتب شعار ليك
و حطه في مكان واضح و في محفظتك لو أمكن .. انا كان شعاري ( والذين جاهدوا فينا لنهدينهم سبلنا )

4 – المكافأة :

يعني لو عملت الفعل العكسي كافئ نفسك و تكون المكافأه متناسبة مع حجم الفعل و خد بالك ان موضوع المكافأة ده مهم جدا .

---------------------------

المحور الثالث :
الشكر لله

( ولئن شكرتم لأزيدنكم ) و هو ده المطلوب .. لأن الطموح في الاخلاق عظيم فا احنا محتاجين الزيادة دائماً و الزيادة لن تأتي الا بالشكر
س/ طب اعرف ازاي عيوبي ؟
ج / اسأل الاهل و الاصدقاء المقربين ليك اللي بتثق في قدرتهم علي الحكم علي الامور عن عيوبك لأنهم ادري الناس بيها بعد ربنا طبعا ..

و اعلم ..
انك لو كنت مش قادر تسأل الناس عن عيوبك .. يبقي انت عندك عيب خطير ولازم تغيره .. ألا وهو ( الكبر )

خد بالك :
ان اللي بيحصل في فلسطين و غيرها من بلاد المسلمين انما هو من جراء عيوبنا .. و لن تتحرر القدس الا اذا تحررنا نحن من عيوبنا ( لن يغير الله ما بقوم حتي يغيروا ما بأنفسهم )

و بكدة تكون فعلا : النهضة بأيدينا ..

يللا .. جرب الوصفة .. وما تستعجلش و تزهق بدري .. خلي نفسك طويل ..
و هكون سعيدة لو عندك سؤال او اضافة و بعتهولي علي الميل ..

الي القاء في البوست القادم
والسلام عليكم و رحمة الله